कामशेत (Kamshet) : मावळातून पावणे तीन लाखांचे ज्वलनशील केमिकल व पांढऱ्या रॉकेलचा साठा जप्त करण्यात आला. बुधवारी (दि. २९) रोजी रात्री साडेसात वाजण्याच्या सुमारास मुंढावरे (ता. मावळ) गावच्या हद्दीतील इंद्रायणी ढाब्याच्या पाठीमागील मोकळ्या जागेत छापा टाकून ही कारवाई करण्यात आली. 

पोलिसांनी दिलेल्या माहितीनुसार, कामशेत पोलीस ठाण्याच्या हद्दीत मुंढावरे गावात इंद्रायणी ढाब्याच्या पाठीमागील मोकळ्या जागेत केमीकलचा व पांढऱ्या रॉकेलचा अवैध साठा केल्याची गोपनीय माहीती मिळाली होती. त्यानुसार बुधवारी (दि. २९) रोजी रात्री साडेसात वाजण्याच्या सुमारास त्याठिकाणी पोलीस पथक, पंच व पुरवठा निरीक्षक तनपुरे यांच्या पथकाने छापा टाकला. तेथे २८ बैरैलमध्ये २ लाख ८८ हजार ६०० रुपये किमतीचे अंदाजे ४ हजार ८१० लीटर ज्वलनशिल केमीकल सदुष्य द्रव्य तसेच पांढरे रॉकेल सदृश्य पदार्थ असे बेकायदेशीररित्या साठा करून  ठेवल्याचे आढळले. सदरचा मुद्देमाल हा जप्त करण्यात आला असून  आरोपी महेंद्र काळुराम चौधरी याच्यावर गुन्हा दाखल करण्यात आला आहे. पुढील तपास पोलीस निरीक्षक रविंद्र पाटील हे करत आहेत.  

सदरची कामगिरी ही पुणे ग्रामीणचे पोलीस अधीक्षक संदिपसिंह गिल, अपर पोलीस अधीक्षक रमेश चोपडे, उपविभागीय पोलीस अधिकारी अमोल मांडवे यांच्या मार्गदर्शनाखाली कामशेत पोलीस ठाण्याचे  पोलीस निरीक्षक रवींद्र पाटील तसेच सहा. पोलीस निरीक्षक सतिष पाटील, सहा. फौजदार नितेंद्र कदम, पोलीस हवालदार समिर करे, गणेश तावरे, पो. कॉ. प्रतिक काळे, गणेश ठाकुर, पोकॉ निशा लालगुडे यांच्या पथकाने केली.

लोणावळा (Lonavala) : किरकोळ कारणावरून झालेल्या वादातून एकाचा खून करण्यात आला आहे. रविवारी (दि. २५) रोजी सायंकाळच्या सुमारास लोणावळा शहरानजीकच्या दहिवली गावाजवळ ही धक्कादायक घटना घडली. या हाणामारीत दोनजण जखमी झाले असून नऊ जणांवर गुन्हा दाखल करण्यात आला आहे. 

कमलेश तानाजी धोपावकर (वय ४५, रा. गुहागर, रत्नागिरी) असे खून झालेल्या पर्यटकाचे नाव आहे. मनोज मधुकर वरवटकर (वय ४२) आणि प्रज्वल उदय मेहता (वय २६) अशी जखमी झालेल्या दोघांची नावे आहेत. याप्रकरणी मनोज वरवटकर यांनी फिर्याद दिली आहे. त्यानुसार निकेश कांबिरे (रा. कर्जत, रायगड), प्रतीक देशमुख, यश कैलास पडवळ (दोघे रा. वेहेरगाव, मावळ), गौरव संजय पट्टाधारी (रा. तुंगार्ली, लोणावळा) आणि त्यांचे चार ते पाच साथीदार यांच्यावर लोणावळा ग्रामीण पोलीस ठाण्यात गुन्हा दाखल करण्यात आला आहे.  

पोलिसांनी दिलेल्या माहितीनुसार, रविवारी कमलेश व त्यांचे काही मित्र लोणावळ्यात आलेले होते. सायंकाळी कार्ला फाटा परिसरातील दहिवली गावाजवळ वाहन वळविण्यावरून पर्यटक व स्थानिक तरुणांमध्ये वाद निर्माण झाला. वादातून हाणामारी झाली. स्थानिकांनी लोखंडी गज, दांडके, कारच्या वायपरनी त्यांच्यावर हल्ला केला. हल्ल्यात कमलेश धोपावकर यांच्या डोक्यात गंभीर दुखापत झाली. त्यांना त्वरित रुग्णालयात नेले असता उपचारादरम्यान त्यांचा मृत्यू झाल्याचे डॉक्टरांनी सांगितले. दोघे पर्यटक जखमी असून त्यांच्यावर उपचार सुरू आहेत. पुढील तपास पोलिस निरीक्षक किशोर धुमाळ यांच्या मार्गदर्शनाखाली सहाय्यक निरीक्षक प्रशांत आवारे हे करत आहेत.

तळेगाव दाभाडे (Talegaon Dabhade) : दोन दिवसांपूर्वी फोनवर झालेल्या वादातून विधिसंघर्षित बालकांकडून दोघांवर धारदार शस्त्रांचे वार करत दगडफेक करण्यात आली. रविवारी (दि. २७ मे) रोजी सायंकाळी साडेचार वाजण्याच्या सुमारास जुन्या मुंबई-पुणे हायवेवरील इंद्रायणी हॉटेल समोर, तळेगाव दाभाडे (ता. मावळ) येथे ही घटना घडली. 

याप्रकरणी विधीसंघर्षीत बालक (रा. शिंदे वस्ती सोमाटणे फाटा, ता. मावळ) याने फिर्याद दिली आहे. त्यानुसार आरोपी विधीसंघर्षीत बालक व त्याचे ३ मित्र सर्वांचे वय (अंदाजे १६ ते १७ वर्ष) यांच्यावर तळेगाव दाभाडे पोलीस ठाण्यात गुन्हा दाखल करण्यात आला आहे.

पोलिसांनी दिलेल्या माहितीनुसार, फिर्यादी व विधीसंघर्षीत बालके यांच्यात दोन दिवसांपूर्वी फोनवर वाद झाला. त्याच वादाच्या रागातून आरोपी हर्षल व त्याचे ३ मित्र सर्वांचे वय (अंदाजे १६ ते १७) यांनी इंद्रायणी हॉटेल समोर येऊन फिर्यादीला जीवे ठार मारण्याच्या उद्देशाने  धारदार हत्याराने डोक्यात वार करण्याचा प्रयत्न केला, परंतु फिर्यादीने डोक्याजवळ हात अडवा केल्याने फिर्यादीच्या हाताला दुखापत झाली. तसेच फिर्यादी व त्याचा मित्र आदित्य अमर कोळी याच्यावर देखील धारदार शस्त्राने वार करून त्याला जखमी केले. तसेच आरोपीसोबतच्या तिघांनी फिर्यादी व त्याच्या मित्राला हाताने मारहाण करून शिवीगाळ करून तसेच दगड फेकुन जखमी केले असल्याचे फिर्यादीत म्हटले आहे. पुढील तपास तळेगाव दाभाडे पोलीस करत आहेत. 

वडगाव मावळ (Vadgaon Maval) : चारित्र्याच्या संशयातून थेट पत्नीची दगडाने ठेचून हत्या करण्यात आल्याचा धक्कादायक प्रकार समोर आला आहे. आज (शुक्रवार दि. २३) रोजी सकाळी सात वाजण्याच्या सुमारास कोंडीवडे (आंदर मावळ) येथे ही घटना घडली.

सोनाबाई अशोक वाघमारे (वय ३३, रा. कोंडिवडे, ता. मावळ) असे खून झालेल्या पत्नीचे नाव आहे. याप्रकरणी मारूती काळुराम पवार (वय ५०, रा. कोंडीवडे आ. मा) यांनी फिर्याद दिली आहे. त्यानुसार आरोपी पती अशोक बारकु वाघमारे (रा. कोंडीवडे ता. मावळ) यांच्यावर वडगाव मावळ पोलीस ठाण्यात गुन्हा दाखल करत त्याला अटक करण्यात आली आहे. 

पोलिसांनी दिलेल्या माहितीनुसार, आरोपी अशोक वाघमारे हा आपल्या मयत पत्नीवर संशय घेवून नेहमीच शिवागाळ व मारहाण  करत असे. आज (दि. २३ मे) रोजी आरोपी व मयत सोनाबाई हे मासेमारी करण्यासाठी जात असताना सकाळी सात वाजण्याच्या पूर्वी कोंडीवडे (अ.मा) ता. मावळ गावच्या हद्दीतील फॉरेस्टच्या ओढयामध्ये मयत सोनाबाई हिच्या डोक्यात, कपाळावर दगडाने किंवा कशाने तरी जबर मारहाण करून तिला जिवे ठार मारलेले असल्याचे फिर्यादीत म्हटले आहे. पुढील तपास सहाय्यक पोलीस निराक्षक डोईजड हे करीत आहेत. 

पुणे (Pune) : मुळशीतील वैष्णवी हगवणे आत्महत्या प्रकरणात आणखी एक महत्त्वाची अपडेट समोर आली आहे. आजची (शुक्रवार दि. २३ मे) पहाट उजाडताच आरोपी पिता-पुत्रांच्या हातात पोलिसांनी बेड्या ठोकल्या आहेत. पुण्यातील स्वारगेट येथून त्यांना ताब्यात घेण्यात आले. त्यानंतर आज दुपारी त्यांना शिवाजीनगर कोर्टात हजर करण्यात आलं. यावेळी पुणे पोलिसांनी या प्रकरणाच्या तपासासाठी दोघांच्या कोठडीची मागणी केली. त्यानुसार कोर्टाने पोलिसांची मागणी मान्य करत पाच दिवसांची पोलीस कोठडी सुनावली आहे. त्यामुळे आता राजेंद्र हगवणे आणि सुशील हगवणे २८ मे पर्यंत पोलीस कोठडीत राहणार आहेत.

वैष्णवी मृत्यू प्रकरणात आतापर्यंत १२ जणांची साक्ष नोंदवण्यात आली आहे. वैष्णवीला पती शशांकने पाईपने मारहाण केली होती. पोलीस तपासात हे स्पष्ट झालं आहे. त्यामुळे पोलिसांनी या प्रकरणाच्या गुन्ह्यात ११८ (२) कलमवाढ केली आहे. पोलिसांनी ज्या पाईपने वैष्णवीला मारहाण केली होती तो पाईप जप्त केल्याची माहिती आता समोर येत आहे. याच मारहाणीचा प्रकार पोलीस तपासात स्पष्ट झाल्याने पोलिसांनी कलमवाढ केली आहे.

वैष्णवीच्या वकिलांकडून महत्त्वाची माहिती

सुनावणीनंतर वैष्णवीच्या बाजूने युक्तिवाद करणाऱ्या वकिलांनी प्रसारमाध्यमांना प्रतिक्रिया दिली. "दोन आरोपींना आणलं होतं. त्यांना पाच दिवसांची पोलीस कोठडी सुनावली आहे. आज पहिलीच पीसी होती. तपास करणं बाकी आहे. पोलिसांनी फॉर्च्युनर गाडी जप्त केली पण आणखी इतर मुद्देमाल जप्त करणं बाकी आहे. तसेच अजून कुणी कुणी मदत केली याचा देखील तपास करणं बाकी असल्याचं कारण पोलिसांनी सांगितलं आहे. तसेच या प्रकरणात आणखी कोणी आरोपी निषपन्न होतील का? त्या अनुषंगानेदेखील तपास सुरु आहे. त्यासाठी देखील पोलिसांनी कोठडी मागितली आहे. तपास अजून चालू आहे. तपासात माहिती समोर येईल तसे आणखी कमल वाढवले जाऊ शकतात", अशी माहिती वकिल शिवम निंबाळकर यांनी माध्यमांना दिली.

भाजपा महिला आघाडीकडून आरोपींवर टोमेटो फेकून तीव्र घोषणाबाजी

दरम्यान, आरोपींना न्यायालयात हजर करत असताना भाजप महिला आघाडीच्या नेत्या हर्षदा फरांदे यांच्या नेतृत्वाखाली महिला कार्यकर्त्यांनी कोर्ट परिसरात दुपारी अडीचच्या सुमारास तीव्र घोषणाबाजी केली. आरोपींवर उपस्थित महिलांनी टॉमेटो फेकण्याचा प्रयत्न केला. या पार्श्वभूमीवर पोलिसांनी बंदोबस्त वाढवला होता.

तर भाजप आमदार चित्रा वाघ यांनी आंदोलनाचे कौतुक करत, “शाब्बास माझ्या वाघीणींनो, आवाज नेहमी बुलंद ठेवा” असा संदेश दिला. तसेच आरोपींना फाशीची शिक्षा व्हावी अशी मागणी करत संताप व्यक्त केला.