तळेगाव दाभाडे (Talegaon Dabhade) : इंदोरी ते सांगुर्डी या मुख्य रस्त्याच्या सुधारणा कामाचे भूमिपूजन आमदार सुनील शेळके यांच्या हस्ते रविवारी उत्साहात पार पडले. मावळ व खेड या दोन तालुक्यांना जोडणारा हा महत्त्वाचा रस्ता अनेक वर्षांपासून प्रलंबित होता. यासाठी आमदार शेळके यांनी केलेल्या विशेष प्रयत्नांमुळे PMRDAच्या माध्यमातून ७.६४ कोटींचा निधी मंजूर होऊन कामाला गती मिळाली आहे.

हा रस्ता तयार झाल्याने नोकरी, व्यवसाय, शिक्षणासाठी प्रवास करणाऱ्या नागरिकांना मोठा दिलासा मिळणार असून सांगुर्डी व इंदोरी गावांमध्ये सुरक्षित, सुगम आणि सक्षम दळणवळणाची सुविधा निर्माण होणार आहे.

कार्यक्रमात मावळ पंचायत समितीचे माजी सभापती विठ्ठल शिंदे, PMRDA सदस्य वसंत भसे, उमेश बोडके, प्रकाश हगवणे, सरपंच संगीताताई भसे, सरपंच शशिकांत शिंदे, यांच्यासह ग्रामस्थ आणि विविध मान्यवर उपस्थित होते. आमदार शेळके यांनी या कामासाठी सहकार्य करणाऱ्या सर्वांचे मनःपूर्वक आभार मानले.

शांताई रेसिडेन्सीमध्ये विकासकामांचे भूमिपूजन

शांताई रेसिडेन्सी को-ऑपरेटिव हौसिंग सोसायटीमध्ये अंतर्गत रस्ता डांबरीकरण व सीमाभिंतीच्या बांधकामाचे भूमिपूजन आमदार सुनील शेळके यांच्या हस्ते पार पडले. सोसायटीतील पायाभूत सुविधा अधिक मजबूत आणि सुरक्षित करण्याच्या उद्देशाने हे काम हाती घेण्यात आले आहे.

या कार्यक्रमास माजी नगरसेवक संतोष दाभाडे, सुरेश दाभाडे तसेच संजय बाविस्कर, राजश्री कुलकर्णी, सुधीर सपाटे यांच्यासह सोसायटीचे सर्व सभासद आणि रहिवासी मोठ्या संख्येने उपस्थित होते. आमदार शेळके यांनी आपल्या भाषणात, “मावळ परिसरात नागरिकांच्या मूलभूत गरजांकडे प्राधान्याने लक्ष देत असून, सर्वांगीण विकासाचा ध्यास घेऊनच काम सुरू आहे,” असे सांगितले.

मावळच्या सर्वांगीण विकासासाठी सातत्याने झटत असलेल्या आमदार सुनील शेळके यांच्या पुढाकारामुळे दोन्ही कामांना गती मिळाल्याने ग्रामस्थांकडून समाधान व्यक्त करण्यात आले.

वडगाव मावळ (Vadgaon Maval) : ज्येष्ठ नेते बापूसाहेब भेगडेंच्या खंद्या समर्थकाची पाचव्यांदा खादी ग्रामोद्योग संघावर वर्णी लागली आहे. सोमवारी (दि. २८) रोजी झालेल्या बैठकीत टाकवे बुद्रुक येथील अंकुशराव आंबेकर यांची पुन्हा एकदा मावळ तालुका खादी ग्रामोद्योग संघाच्या अध्यक्षपदी तर उपाध्यक्षपदी भरत गरुड यांची बिनविरोध निवड झाली.

याप्रसंगी राष्ट्रवादी काँग्रेसचे माजी तालुकाध्यक्ष बबनराव भेगडे, कृषी उत्पन्न बाजार समितीचे संचालक सुभाषराव जाधव, माजी सभापती गुलाबराव म्हाळसकर, माजी उपसभापती शांताराम कदम, पुणे जिल्हा राष्ट्रवादी काँग्रेसचे माजी जिल्हाध्यक्ष सचिन घोटकुले, पुणे महानगर नियोजन समितीचे सदस्य संतोष भेगडे, पुणे जिल्हा राष्ट्रवादी काँग्रेसचे माजी कार्याध्यक्ष संतोष मु-हे, खरेदी विक्री संघाचे सभापती शिवाजी असवले, कृषी उत्पन्न बाजार समितीचे उपसभापती नामदेव शेलार, राष्ट्रवादी काँग्रेसचे माजी कार्याध्यक्ष सुनील दाभाडे, माजी सरपंच नाथा झांबरे,भाजपा सरचिटणीस अभिमन्यू शिंदे, श्री पोटोबा देवस्थान ट्रस्टचे सचिव अनंता कुडे, शरदचंद्र पवार राष्ट्रवादी युवक काँग्रेसचे तालुका अध्यक्ष विशाल वहिले, पुणे जिल्हा शरदचंद्र पवार राष्ट्रवादी काँग्रेसचे अध्यक्ष अतुल राऊत आदी मान्यवर उपस्थित होते.

यावेळी निवडणूक निर्णय अधिकारी म्हणून मंदार कुलकर्णी यांनी काम पाहिले. बिनविरोध निवडीच्या घोषणेनंतर मान्यवरांच्या हस्ते नवनिर्वाचित अध्यक्ष आंबेकर व उपाध्यक्ष गरुड यांचा सत्कार करण्यात आला.

याप्रसंगी बोलताना बापुसाहेब भेगडे म्हणाले, मावळ तालुक्यामधील पुढील काळात होणाऱ्या सर्व सहकारी संस्था, स्थानिक स्वराज्य संस्था निवडणूकीमध्ये नवीन कार्यकर्त्यांना संधी देणार असल्याचे सांगितले.

 

खादी ग्रामोद्योग संघाचे संचालक मंडळ

▪️ साहेबराव तुळशीदास मोहिते (खनिज आधारित उद्योग)
▪️ सुरेश धोंडीबा जाधव (वनावर आधारित उद्योग)
▪️ भरत गणपत गरूड (कृषी आधारित व खाद्य उद्योग)
▪️ अंकुश रामचंद्र आंबेकर (पॉलीमर व रसायन आधारित उद्योग)
▪️ छबुराव चिंधू गायकवाड (अभियांत्रिकी व अपारंपारिक उर्जा)
▪️ चंद्रकांत निवृत्ती दाभाडे (वस्त्रोद्योग व सेवा उद्योग)
▪️ भावना सुभाष ओव्हाळ (महिला प्रतिनिधी)
▪️ कल्पना अनिल भोर (महिला प्रतिनिधी)
▪️ अमित पांडुरंग ओव्हाळ (अनुसुचित जाती/जमाती)
▪️ संतोष दगडू कुंभार (इतर मागास वर्ग)
▪️ अन्वर इब्राहिम सिलीकर (भ.ज/विमुक्त जाती/जमाती/विशेष मागास प्रवर्ग)

वडगाव मावळ (Vadgaon Maval) : अल्पसंख्यांक समाज हा आपल्या राष्ट्राच्या विकासाचा अविभाज्य भाग आहे. त्यांच्या समस्या जाणून घेऊन त्या सोडवण्यासाठी आम्ही कटिबद्ध आहोत. समाजाच्या प्रत्येक घटकाला मुख्य प्रवाहात आणण्यासाठी ठोस उपाययोजना राबविण्यात येतील, असा निर्धार आमदार सुनील शेळके यांनी आज (सोमवार दि. २८) व्यक्त केला.

मावळ तालुका राष्ट्रवादी काँग्रेस अल्पसंख्यांक सेलच्या आढावा बैठकीत ते बोलत होते. यावेळी अल्पसंख्यांक सेलचे तालुकाध्यक्ष बाबा मुलानी, महिला तालुकाध्यक्ष शबनम खान, वडगाव शहराध्यक्ष मजहर सय्यद, लोणावळा शहराध्यक्ष हाजी शेख, प्रवक्ते फिरोज शेख, मुनव्वर ईमानदार, जाकिर खलीफा, रज्जाक मनियार, अतिक शेख, मुसा शेख, बाबुलाल नालबंद, जमिर नालबंद यांच्यासह अनेक मान्यवर कार्यकर्ते उपस्थित होते.

या बैठकीत अल्पसंख्यांक समुदायासमोरील विविध अडचणी, त्यांच्या विकासासाठी आवश्यक उपाययोजना यावर सखोल चर्चा झाली. मस्जिद, दफनभूमी तसेच इतर सामाजिक विकासकामांसाठी निधी उपलब्ध करून देण्याच्या अनुषंगानेही निर्णय घेण्यात आला. आमदार शेळके यांच्या मार्गदर्शनाखाली बैठक उत्साहात पार पडली.

पवनानगर (Pawnanagar) : मावळ तालुक्यासह औद्योगिक नगरी पिंपरी चिंचवडला पाणी पुरवठा करणाऱ्या पवना धरण परिसरात  धनाड्य व्यक्तींकडून मोठ्या प्रमाणात अवैध बांधकाम थाटण्यात आले आहे. याची पाहणी करण्यासाठी राज्याचे जलसंपदा मंत्री डॉ. राधाकृष्ण विखे पाटील यांनी शनिवारी (दि. २६) रोजी पवना धरण परिसराला भेट दिली. या पाहणी दौऱ्यावेळी धरण परिसरात मोठ्या प्रमाणात अवैध बांधकाम आढळून आल्याने मंत्री विखे पाटील यांनी अधिकाऱ्यांचे चांगलेच कान टोचले. 

 

धरणातील अतिक्रमण, पाण्याचे नियोजन, पाणी प्रदूषण नियंत्रण, धरण सुरक्षा, शासकीय जमीनीचे रक्षण, तसेच धरण क्षेत्रालगत पर्यटनवाढीच्या दृष्टीने व स्थानिकांच्या रोजगार निर्मितीसाठी राबविण्यात येणाऱ्या प्रकल्पाच्या आराखड्यांबाबत अधिकाऱ्यांना सुचना देण्यात आल्या आहे.

यावेळी त्यांच्यासमवेत मावळचे आमदार सुनील शेळके, दौंडचे आमदार राहुल कुल यांची प्रमुख उपस्थिती होती. तर जलसंपदा विभागाचे कार्यकारी संचालक अतुल कपोले, मुख्य अभियंता हनुमंत गुणाले, मुख्य अभियंता हेमंत धुमाळ, कार्यकारी अभियंता श्वेता कुऱ्हाडे, सहाय्यक अभियंता सचिन गाडे, मावळ मुळशी उपविभागीय अधिकारी सुरेंद्र नवले, तहसीलदार विक्रम देशमुख यांच्या सह पदाधिकारी व अधिकारी, कर्मचारी उपस्थित होते.

येत्या पंधरा दिवसांत अतिक्रमणे काढा - मंत्री विखे पाटील

पवना धरण परिसरात मोठ्या प्रमाणावर धरणाच्या जागेवर धनदांडग्यांनी अतिक्रमणे करुन भलेमोठे बंगले, फार्महाऊस उभारले  असून याबाबत अधिकाऱ्यांना विचारले असता धरणाच्या जागेवर अवैध कामे कशी झाली यावर अधिकारी अनुत्तरित होते. त्यामुळे येत्या पंधरा दिवसांत अतिक्रमणे काढण्याच्या सुचना त्यांनी अधिकाऱ्यांना दिल्या आहे.

पाण्याचे नियोजन काटेकोरपणे करा

मावळसह पिंपरी चिंचवड भागाला पाणीपुरवठा करणाऱ्या  पवनाधरणाच्या पाण्याचे नियोजन करुन भविष्यात पाणी कमी पडणार नाही, याबाबत सुनियोजन करण्याच्या सुचना अधिकाऱ्यांना देण्यात आल्या आहे.

पवना धरणाची सुरक्षा यंत्रणेला सुचना

पवना धरणाच्या पाण्यावर संपूर्ण पिंपरी चिंचवडसह मावळ भाग अवलंबून असल्याने धरणाच्या सुरेक्षेकडे काटेकोरपणे लक्ष घालून धरणाच्या मजबुतीकरणाचा प्रश्न लवकरच मार्गी लावणार आहे. धरण परिसरात मोठ्या प्रमाणावर पर्यटक येत असल्यामुळे त्यांच्या सुरक्षेला प्राधान्य द्यावे. पर्यटकांना पाण्यात जाताना योग्य ती काळजी घेण्याबाबत सुचना द्याव्या, अशा सूचना केल्या. यावेळी पर्यटन क्षेत्र वाढिवर भर देणार असल्याचे त्यांनी नमूद केले आहे.

तळेगाव दाभाडे (Talegaon Dabhade) : तळेगाव दाभाडे नगरपरिषदेच्या सभागृहात सोमवारी (दि. २१) रोजी तालुकास्तरीय लोकशाही दिनाचे आयोजन करण्यात आले होते. यावेळी समस्यांच्या भडीमाराने तालुकास्तरीय लोकशाही दिन 'वादळी' झाला. गेल्या पाच-सात वर्षांपासून विवादात असलेले तळे उत्खनन, बेकायदेशीर सोमाटणे टोलनाका आणि न्यायप्रविष्ट प्रकरणांमधील कामांची ठेकेदारांना अदा केलेली ज्यादा बिले यासर्व महत्वपूर्ण विषयांना जागृत नागरिकांनी हात घातला असता जबाबदार अधिकाऱ्यांनी भर उन्हाळ्यात आश्वासनांचा पाऊस पाडला. 

कार्यक्रमाच्या अध्यक्षस्थानी तहसीलदार विक्रम देशमुख होते. सार्वजनिक बांधकाम विभागाचे उपअभियंता डी. एच दराडे, उपमुख्याधिकारी कल्याणी लाडे, लोणावळा उपअभियंता अशोक काळे, अखिल भारत ग्राहक पंचायतीच्या नयना आभाळे, पोलीस उपनिरीक्षक डी. ए. वारे, सहाय्यक पोलीस निरीक्षक सतीश पाटील, पंचायत समितीचे गटशिक्षणाधिकारी एस. आर. वाळुंज, मंडल अधिकारी एल. व्ही. सलगर, जलसंधारण अधिकारी दीपक ढवळे, तलाठी के. व्ही. मोहमारे, विशाल रिटे आदी अधिकारी तसेच सामाजिक कार्यकर्ते, शासकीय योजनांचे लाभार्थी आणि नागरिक उपस्थित होते.

प्रशासकीय राजवटीतील कामांचा दर्जा आणि त्रुटींबाबत प्रश्न 

यावेळी फुले-शाहू-आंबेडकर प्रतिष्ठानचे सचिव जयंत कदम यांनी भामा आसखेड धरणातील पिण्याचा पाण्याची योजना केव्हा पूर्ण होणार, असा प्रश्न उपस्थित केला. तळेगावातील पिण्याच्या पाण्याची योजना, रस्ते, भुयारी गटर योजना, पथदिवे, सांडपाणी वाहिन्या तसेच नगर परिषदेच्या गेल्या तीन वर्षातील प्रशासकीय राजवटीतील विकास कामांमधील कामाचा दर्जा आणि त्रुटींबाबत प्रश्न उपस्थित केले.

न्यायप्रविष्ट प्रकरणांमध्येही ठेकेदार धार्जिणी अधिकाऱ्यांवर कारवाईची मागणी

ईगल तळेविकास प्रकल्पात शासनाने नगर परिषदेस ठोठावलेल्या ७८ कोटी रुपयांच्या दंडाबाबत कदम यांनी प्रश्न विचारला. ही बाब न्यायप्रविष्ट असताना नगर परिषदेने याच काळात ठेकेदारांची बिले कोणाच्या सांगण्यावरून अदा केली, असा सवाल उपस्थित केला. तळेगाव दाभाडे नगरपरिषदेमध्ये अधिकारी आणि ठेकेदारांमध्ये लागेबांधे असून, बोगस बिल काढल्याप्रकरणी त्यांच्यावर कारवाई करण्यात यावी, अशी मागणी माने यांनी केली. आपल्या तक्रारींबाबत निवेदन देण्यात यावे, वरिष्ठांना याबाबत माहिती देण्यात येईल, सखोल चौकशी केली जाईल, असे आश्वासन तहसीलदार विक्रम देशमुख यांनी दिले.

३० किमीमध्ये चार टोलनाके

माजी नगरसेवक अरुण माने यांनी सोमाटणे येथील बेकायदेशीर टोलनाका बंद करण्यात यावा, अशी मागणी केली. सोमाटणे ते लोणावळा दरम्यान ३० किलोमीटर अंतरात चार टोलनाके असून, शासनाच्या जीआरनुसार दोन टोल नाक्यांमध्ये किमान ६० किमी अंतर असावे. शासनाच्या नियमांची अंमलबजावणी का केली जात नाही, असा सवाल माने यांनी उपस्थित केला.

३५ पैकी केवळ १७ अधिकारी हजर; जबाबदार अधिकाऱ्यांकडूनही तहसीलदारांच्या पत्राला 'दाद' नाही

दरम्यान, तालुक्यातील विविध शासकीय विभागातील ३५ अधिकाऱ्यांना तहसीलदार विक्रम देशमुख यांनी लेखी पत्राद्वारे  कार्यक्रमाची माहिती दिली. मात्र केवळ १७ अधिकारीच कार्यक्रमाला हजर होते. त्यामुळे ३५ पैकी १८ अधिकाऱ्यांनी खुद्द तहसीलदार देशमुख यांच्या पत्रालाही दाद दिली नसल्याचे निदर्शनास येताच, नागरिकांनी नाराजी दर्शवली. तसेच  अनुपस्थित अधिकाऱ्यांवर ठोस कारवाई करण्याची मागणी यावेळी करण्यात आली.